అలనాటి రేడియో నాటికలు

అసలు విజయవాడ అంటేనే ఇది “మనవాడ” అని ఆ ప్రాంతంతో అనుబంధం ఉన్నావారికి అనిపిస్తుంది. అక్కడ పుట్టిపెరిగిన వారికి మరొక అనుబంధం ఆకాశవాణి. వారి ప్రసారాలు కాలప్రవాహంలో లీలగా వెంటాడుతూనే ఉంటాయి. ఆ రోజుల్లో ఏ కొద్దిమందికో మాత్రమే రేడియో ప్రసారాలు రికార్డు చేసుకొనే అవకాశం ఉండేది. ఉన్నా ముందుచూపుతో భద్రపరచిన వాళ్ళు చాలా తక్కువ. ముందు ముందు సాంకేతిక పరిజ్ఞానం అబివృద్దిచెందుతుందని ఊహించని రోజులవి. ఈ రోజుల్లో మనమే నిత్యం ఎన్నో విని, చూచి, చదివి పారేస్తుంటాం. కానీ వాటిల్లో కొన్ని అయినా భద్రపరిస్తే, కొన్ని సంవత్సరాల తరువాత వాటిని చూసుకుంటుంటే కలిగే ఆనందం వేరు. 

 వెనుకటికి “అన్నీ వేదాల్లోన్నే ఉన్నాయష” అని కన్యాశుల్కంలో గురజాడవారు పలికించారు. ఈ కాలంలో అన్నీ అంతర్జాలంలోనే ఉన్నాయి అనుకోవటంలో తప్పులేదు. కానీ ఉన్న విషయం చాలామందికి తెలియకపోవచ్చు. తెలుగు బ్లాగులు వీక్షించేవాళ్ళల్లో శ్రీ శివరామప్రసాద్ గారి బ్లాగు “సాహిత్య - అభిమాని” ఎరగని వాళ్ళు ఉండకపోవచ్చు. అనేక బ్లాగుల్లో వీరి రూపం దర్శనమిస్తూనేవుంటుంది. పేరుకి సాహిత్యాభిమానిగా అగుపిస్తున్నా వారు సంగీతాభిమాని కూడా అని వారి బ్లాగు చూస్తే అర్ధం అవుతుంది. వారు ఆ రోజుల్లో క్యాసెట్ల మీద రికార్డు చేసుకున్న విజయవాడ కేంద్రం వారి హాస్య నాటికలు mp3లోకిమార్చి ముందుతరాల వారికోసం అంతర్జాలంలో భద్రపరిచారు. ఇది చిన్న విషయం అనిపించవచ్చు కానీ ఆ నాటికలు వింటుంటే మనం గూడా ఇలా చేసివెంటే బావుండేదిగదా అనిపిస్తుంది.

 హాస్యనాటికలు అంటేనే గుర్తుకు వచ్చేది నండూరి సుబ్బారావు గారు, పుచ్చా పూర్ణానందం గారు, నాగరత్నమ్మ గారు, సీతారత్నం గారు. ఈ నాటకాల్లో రత్నంగార్ల సణుగుళ్లు, సుబ్బారావు గారి గొణుగుళ్లు, వీళ్ళ ఎకసెక్కాలు చాలా సరదాగా ఉంటాయి.

 తాళం చెవులు, దొందూ – దొందే , మా ఆవిడతో పెళ్ళికి, పూటకూళ్ళు, బామ్మగారి రేడియో అనే అయిదు నాటికలు శివరామప్రసాద్ గారు రికార్డు చేసి భద్రపరిచారు. నలుగురి దృష్టికి ఈ నాటికలు తేవాలన్న ఉద్దేశంతో ఇక్కడ పోస్ట్ చెయ్యటం జరిగింది. ఈ కింది లింకు ద్వారా వాటి వివరాలు చదివి, విని ఆనందించండి. 

https://archive.org/details/06KRISHNAPUSHKARAMRADIODOCUMENTARY 

అక్కడే చివర్లో కృష్ణా పుష్కరాల మీద ఒక రూపకం కూడా ఉన్నది. 1980 పుష్కరాల నాటికి విజయవాడ రూపురేఖలు మారిపోయాయి. కాలవల గట్లమీద ఉండే పాకలు గుర్తుండే వుంటాయి.  వాటినన్ని తొలగించి ఊరి చివరకు మార్చి నగరానికి శోభ కలిగించారు. బహుశ శ్రీ ఏ. వి. ఎస్. రెడ్డి గారు అప్పుడు జిల్లా కలెక్టర్ గా ఉన్నారనుకుంటాను.

ఆకాశవాణి వారి రూపకాలు చాలా బావుంటాయి. కొన్ని రూపకాల్లో తెలియకుండానే మనం కూడా అంతర్లీనంగా ప్రవహిస్తున్న అనుభూతి కలుగుతుంది. మరి విజయవాడ అన్నాక విశ్వనాధ వారు గుర్తుకురాకుండా ఉంటారా. ఆ రూపకం విన్నాక అందులో వినవచ్చే విశ్వనాధ వారి పద్యాన్ని, కృష్ణవేణీ నదీమతల్లి పుష్కర వివరాలను సాహిత్యరూపంలో కూడా ఒకమాటు చూడండి.

Tags: Krishna pushkaram, radio natikalu, akashavani, vijayawada